كانت احدى فوائد تاسيس موقع خاص لي ككاتب هو اشباع فضولي في معرفة الدول التي يسكن فيها الاخوة القراء الذين يتابعون مقالاتي المتواضعة

ومنذ تاسيس الموقع قبل 3 اسابيع اصبح عدد الداخلين (لاول مرة) الى موقع الدكتور يونس حنون (حتى لحظة كتابة هذه المقالة) 1003 شخص بعين الحسود ….وبعيون وزراء المالية والنفط والكهرباء ومحافظ البصرة ومعاهم مقتدى الصدر وحارث الضاري

وغالبية القراء خارج العراق حسب ظني هم من العراقيين الذين دفعتهم الظروف القاهرة  وقذارة الحكام الى الهروب بجلودهم الى حيث القت ابتداءا” من دول الجوار وحتى تلفات الدنيا …بدء النزوح منذ عهد بطل الحفرة وحروبه الكارثية الخائبة التي احرقت الاخضر واليابس ،وتواصل بلاهوادة في عهد قرةقوزات المنطقة الخضراء من عملاء ايران والسعودية الذين اتموا المجزرة فسرقوا ونهبوا وقتلوا  وهجروا ….لتصبح اعداد المشردين العراقيين اعلى من نفوس الشعب الفلسطيني بشرائحه من نازحين ولاجئين وصامدين وعرب ثمانية واربعين

وهكذا توزع العراقيون الى جهات الارض الاربعة والى كل بقعة قبلتهم …..وربما لانعرف نسب توزيع العراقيين في مختلف الدول على وجه الدقة… لكني فوجئت ان الدولة الاولى في العالم التي فيها اعلى نسبة من قراء مقالاتي هي ….امريكا …..اي والله نفس امريكا اللي بيها وكالة ناسا والامبايرستيت و انجيلينا جولي… حيث ان نسبة 34% من جمهوري العزيز ( على اساس اني علي محمود العيساوي) يسكنون هناك ..تليها في المرتبة الثانية كندا بنسبة تقارب 20% …..ثم السويد بنسبة 8%….بينما نسبتهم في داخل العراق نفسه لاتتجاوز 6%…حقها الناس ….منين يجيبون كهرباء حتى يفتحون الانترنيت……علاوة على ان هذه الارقام لاتشمل من يقرأ لي في مواقع اخرى خاصة موقع الحوار المتمدن وكتابات

ولم يخطر ببالي ان تكون ثاني دولة عربية فيها متابعين لما يكتبه يونس حنون هي السودان ….بنسبة تصل الى تقريبا” الى 4% من مجموع القراء ……ولا اعرف ان كان تفسير ذلك وجود اعداد كبيرة من العراقيين هناك ام لان بين الاخوة السودانيين من يحب مقالات يونس حنون ام الاثنين معا …والحقيقة ان قاريء كريم لا اعرف جنسيته ارسل لي مرة عنوان موقع اسمه سودانيز اون لاين نشر فيه مقالة تخلف دوت كوم

http://www.sudaneseonline.com/cgi-bin/sdb/2bb.cgi?seq=msg&board=240&msg=1250326125

وموقع اخر لجمعية الصحفيين السودانيين في السعودية سبق ان نشر مقالة شهيد الاسلام …مايكل جاكسون

http://www.sudanja.net/articles.php?action=show&id=184

فشكرا للاخوة في السودان على متابعاتهم

لكن الصدمة الكبرى كانت اكتشافي ان لي في دولة اسمها سلوفينيا سبعة قراء………….الله يكون بعونكم ياعراقيين …هيجي انسدت بوجوهكم مالكيتو غير هذي السلوفينيا …..ولاني لم اكن اعرف شيئا عن هذه الدولة سوى انها من مناطق الاتحاد اليوغسلافي السابق ونالت استقلالها عام 1991فقد قررت البحث عن  معلومات عن احوالها.. فتبين لي انها دولة صغيرة لكنها جميلة وتتميز بموقع جغرافي غريب ، فهي تحاذي جبال الالب ولها في نفس الوقت اطلالة على البحر الابيض المتوسط….. ولها حدود مع ايطاليا والنمسا وكرواتيا ….عاصمتها اسمها لوبليانا….ومساحتها  الكلية 20 الف كيلومتر مربع اي اقل من عشر مساحة العراق وعدد سكانها اكثر بقليل من المليونين….يعني بقدر عدد سكان مدينة الثورة في بغداد ( والتي اسموها نفاقا مدينة صدام ثم مدينة الصدر والاثنان لاعلاقة لهما بالمدينة سوى ان الاول تسبب بخرابها واهمالها والثاني تسبب ابنه المخبول  في تخلفها وتغطيتها بالسواد ) لكن هذا موضوع ثاني

المهم اني  شاهدت  صورا” رائعة لهذه الدولة الساحرة على الانترنيت تظهر طبيعتها الخلابة

فعيني عوافي على كل عراقي ساكن بيها …بس محد بيكم يا اعزائي السبعة يسويها لخاطر الله ويدورلنا واسطة…او يكلف نفسه يحصللنا فيزا ……. مازال بيكم  معجبين بحضرتي ..مو طكت روحي من اكل المنسف

اما الاكتشاف الذي كما يقولون ماينلبس عليه عكال فهو وجود 6 قراء منتظمين ليونس حنون في(خلي اوشوش احسن لايسمعني فد مجاهد حابب يفجر نفسه ويعتبرني هدية من السما) ،نعم لدي 6 قراء في اسرائيل ( اي نعم نفس الدولة اللي كانوا البعثية يسموها الكيان الصهيوني باعتبار كلمة اسرائيل تسويلهم ارتكاريا) خطية نوازيك

وفي البداية قلت لنفسي ربما المقصود فلسطين…. لكن وكما تلاحظون من الجدول المرفق فمناطق السلطة الفلسطينية مذكورة في خانة اخرى منفصلة

United States            385     33.51%  
 
  Canada            227     19.76%  
 
  Sweden            93     8.09%  
 
  Netherlands            65     5.66%  
 
  Iraq            63     5.48%  
 
  Germany            47     4.09%  
 
  Sudan            45     3.92%  
 
  United Arab Emirates            43     3.74%  
 
  Australia            26     2.26%  
 
  Kuwait            22     1.91%  
 
  Malaysia            18     1.57%  
 
  United Kingdom            15     1.31%  
 
  Egypt            13     1.13%  
 
  Jordan            13     1.13%  
 
  Saudi Arabia            8     0.70%  
 
  Denmark            7     0.61%  
 
  Slovenia            7     0.61%  
 
  Syrian Arab Republic            6     0.52%  
 
  Israel            6     0.52%  
 
  Qatar            5     0.44%  
 
  Algeria            4     0.35%  
 
  Ireland            4     0.35%  
 
  New Zealand            4     0.35%  
 
  Bahrain            3     0.26%  
 
  Italy            3     0.26%  
 
  France            3     0.26%  
 
  Belgium            3     0.26%  
 
  Yemen            2     0.17%  
 
  Norway            2     0.17%  
 
  Satellite Provider            1     0.09%  
 
  Palestinian Territory, Occupied            1     0.09%  
 
  Philippines            1     0.09%  
 
  Hungary            1     0.09%  
 
  Austria            1     0.09%  
 
  Oman            1     0.09%  
 
  Pakistan            1     0.09%  
 

 

يعني ما يكفي ثلث الي يقرولي ساكنين يم جورج بوش واوباما ….هالمرة بيهم من ربع نتانياهو؟

وتعال قنع حجي احمد اغا اني مو عميل الموساد ولا السي آي أي

عمي منو يصدك ….اذا اخوية ابن امي وابوية قال لي عيني يونس شدعوة خابص روحك؟ منو ما يكول هذولة القراء اكثرهم  يقرون مقالتك وبعدين يكولون من عاب هيج كاتب ؟ لوشنو هالسخافات؟

هسة افتهمت ليش العرب والاكراد يسموهم اخوان

بس مع ذلك اني كلش خاشة سلوفينيا بعقلي واتمنى ان يراسلني واحد او اكثر من الاخوان السبعة بلكت تصير قسمة واشوف هالدولة ولو زيارة….لان اريد افتهم شلون اندلوها ربعنا…. وشلون حصلوا فيزتها وشديشتغلون بيها ….واهم شي ……فاتحين مكتب مال السيد هناك لو لا؟