الاخ الكريم سرمد الجراح بعث مشكورا بمشاركته الثانية

عيني ابو السرامد

الله يخليييييييييييييييييييييييييييييييييك

مقالاتك شوية سويها اطول خلينا نتمتع بيها اكثر

لاتصير بخيل

مع المحبة

يونس

مقابله تلفزيونيه مع السيد رئيس الجمهوريه

 

السيد رئيس الجمهوريه (المنتهيه ولايته وصلاحيته السياسيه والتكاثريه, بس لازك بالكرسي كالعاده) وفي مقابله تلفزيونيه سأله مقدم البرنامج هل تعرضتم لمحاوله أغتيال ؟ فأجاب سيادته ببراءة وعفوية ابن جبال العراق قال: لا لم اتعرض لمحاولة أغتيال  فأنا  لي كثير من الاصدقاء البعثيين !!!!! كلش قويه, يعني شتقصد سيادتك ؟؟؟

محد يغتال بس البعثية؟

لعد جرابيع  القاعدة وفيلق غدر وجيش المهدي والاسايش كلهم مساكين مايتفاهمون غير بالحكمة والموعظة الحسنة…؟

ثم تعال هنا عمو جلال

البعثية يغتالون؟ كول غيرها يمعود

معقوله هذا الحزب البيئي والمناهض للاجهاض ولاستخدام الخلايا الجذعيه في الابحاث العلميه, يغتال ؟؟ شنو هل دعايه المغرضه, المفروض الحزب القائد يرفع على سيادتكم قضية سب وقذف (ولو هاي الثانية محد حيصدكها، واسالوا السيدة الاولى  اكيد حتكللكم :اووووف ….خلوني بقهري) .

فنرجع ونكول  ليش تتهم الناس بلا دليل قابل لكيت بالقصر الجمهوري مقبره جماعيه؟؟؟ أجب, أبن, أفصح, بداعت رئيس البرلمان السابق عليك. لا والالطف يكول اصدقائي !!! عود آني مكيف مصادق ابن خالة شرطي المرور الواكف براس شارع نانسي عجرم,  قبل مايشتغل الحسد شوفوا العالم شمصادقين, يا نانسي يا أليسا, من عزوز ابو الثلج الى شبلي شيميل وللميعرف شنو شيميل خلي يكتبهه بمحرك البحث بس من تنام المره والجهال. !! اي ياسيادة الرئيس لمن انته وياهم هيج ميانه ودك اصبعتين ماتحجيلنه وياهم يخفّون اديهم شويه عن ولد الخايبه. يابه انشاء الله تكمع رئيس الوزراء السابق واللاحق اذا ما تسويلنه واسطه وياهم. بالمناسبه حتى لا واحد يضحك ويكول هاي سالفه ما يحجيهه إلا واحد من الشمال خلي اكلكم ان القناة العراقيه اللي ذاعت المقابله وعبرت عليهم الحجايه, هيه قناة معروفه بميولها لأصدقاء السيد الرئيس,!! وما أكول ولا كلمه أكثر لأن ماعندي ولا صديق منهم !!! اللهم اجعل كلامنه خفيف عليهم.

 

سرمد الجراح

s.aljarra7@gmail.com