شلش العراقي ، اروع كاتب ساخر عرفناه

توقف فجأة عن الكتابة قبل 3 اعوام ودون سابق انذار

هذه احدى مقالاته التي نشرت قبل 5 سنوات وعنوانها

فطومة راح اتسافر الكندا

قراءة ممتعة

——————————-

ستسافرفطومة غدا من مدينة الثورة الى كندا  ، لتتزوج من ابن عمها ارحيم 

وبهذه المناسبة التاريخية ‫عمشة خالة فطومة جلست تقدم النصائح تلو النصائح لابنة اختها فأول شيء طلبته منها هو تغيير (اللوك ) يعني تعديل جهرتها وجعلها (مودرن) ، 

 قصت لها ظفيرتيها وذهبت بها الى بيت حمدية الحفافة ، لتقوم بواجبها على اكمل وجه من ناحية (قاط الشيرة القوي) ، عادت بها الى البيت وباشرت وشم جسد البنت المسكينة برسوم وكلمات اجنبية وعربية ، (حتى ارحيم ليكول اجيتيني متخلفة وكلشي متعرفين واني سويتج ادمية) ، فقد رسمت على كتفها الايسر عقرب اسود ، وكتبت على بطنها (اه ونص ) ، وفي مكان اخر كتبت (هسة ارتاح كَلبي)‫وبعد الانتهاء من هذه المهمة النبيلة اعطت الخالة الحنون دروسا خصوصية  في الحياة الزوجية: 

 فمن (كلوب احمر ابو الستين) الذي يجب ان يضيء غرفتها يوميا بعد التاسعة بتوقيت كندا المحلي ،الى نوعية الشراشف الناعمة الملمس ،الى ملابس النوم والبخور والبقلاوة التي تقدم كوجبة مهمة قبل النوم .. 

انهت الخالة عمشة دروسها بتقديم ورقة ملفوفة بقطعة قماش خيطت بعناية لتضعها العروس تحت وسادتها لتطرد الجن والشياطين الكندية تحديدا،‫الان جاء دور العمة ،التي اوصتها باطاعة الزوج والامتثال  لاوامره وعدم رفع الصوت امامه وعدم الذهاب الى السوك او للعيادة الشعبية او للجيران بدون علمه ، كما اوصتها بالنظافة وكنس باب البيت يوميا ونشر البسط والبطانيات على السطح (من تطلع الشمس) وان تكون (مرة شاطرة ) تكعد من غبشة تخبز وتطبخ وان لاتتشرط وتاكل الي الله قاسمه وتشارك رجلها بالحلوة والمرة.‫وبالاضافة الى هاتين الوصيتين يمكننا تسجيل مجموعة اخرى من وصايا الجارات العزيزات‫

 * بنيتي الاجانب مايحبون الغيبة والنميمة والقال والقيل ،ديري بالج تكرضين احد كدامهم 

‫*الكنديات عيونهن تكتل ديري بالج من الحسد ،يومية اقري المعوذات ونامي ..‫ 

* الاجنبيات سمعهتن موهلكد لاتختلطين بيهن هواي ، تره يجرنج للطريق . 

‫* مو تتبواسين وية الزلم مثل مايسوون بالتلفزيون تره هاي عدنه مايلبس عليها ثوب 

‫* خلي بالج على رجلج تره الكنديات ياما هجمن بيوت .‫ 

* اذا كالولج (كود مورننك ) يعني صباح الخير واذا ( كود ايفننك ) يعني مساء الخير‫ 

* اذا قدمولج عرك لوبيرة كليلهم (ثانكيو فري ماج) بلاعيمي توجعني . 

‫* مو كل يوم زعلانه ، ترى الطيارة كروتها كلش كلش  غالية .. 

‫* اخذي وياج كاسيتات ردح حتى تتذكرين الثورة . 

‫* اذا قدمولج بيبسي موتشربي كله ، جنج ماشايفه ، خلي منه شوية بالبطل 

‫* لاتذبين تنكة الزبالة بالركن ، ترى راسا يجوج الشرطة . 

‫* اذا سألوج شيعية لو سنية كليلهم كلنا مسلمين ماكو فرق . 

‫* اذا طلكج ارحيم ، بس كليلهم هذا ارهابي وانت معليج، يصلخوه صلخ..وداعتج يودون جلده للدباغ هذا الساقط . 

‫* اذا واحد غمزلج لاتكولين لارحيم عليه ، سوي روحج ما شفتي ترى تصير بالتواثي‫ 

* مو تفلين بالكاع ترى يغرموج ورقتين .

  ‫استمعت فطومة لهذه النصائح القيمة واستاذنت الجميع لتنام ، الجارات زعلن و لم يرق لهن تصرفها هذا ، خاصة وهذه هي اخر مرة يلتقين بها لانها ستسافر غدا ، خرجن على الفور زعلانات وعقدن مؤتمرا  في منتصف الشارع جاء فيه

 

‫* والله  اذا مالعبت شاطي باطي  هناك وفضحتنه اني مو سعيدة 

‫* يمعودة عبالج اتوب نفس الشي، راح تكض الباب وتأشر للرايح والجاي 

‫* هو ارحيم ما لكه غيرها ، لو سألني جان عددت كل فتوكها 

‫*الله هي  هاي شكولات مال كندا ، همه عايزيين دببة ورايحتلهم فطومة ام بوز 

‫* هسة هو ارحيم شلونة ، يكولون حتى بكندا بعده املح وسنونة طايحة وكصته امشكه ويبيع غاز بعربانة‫ 

* اذا فطومة مافلتت ويه شاب كندي اشكَر وتعال ياعمي شيلني ماتسمى باسمي‫ 

* وين الله ويرجعوها من الحدود عبالهم كاولية 

‫* انشالله بكندا وتطك عليها عبوة .‫ 

* لايمعودة لتخافين عليها هاي عده حظ مال ككككك